धनगढीस्थित एसपीए क्याम्पसमा आज एक महत्त्वपूर्ण कार्यशाला आयोजना गरिएको छ।
कार्यशालामा बि.आइ.एम संकायका दोस्रो, चौथो तथा पाँचौँ सेमेस्टरका विद्यार्थीहरू सहभागी भएका थिए। क्याम्पसको सेमिनार हलमा सम्पन्न भएको यो कार्यशालामा विद्यार्थीहरूले आफ्नो शैक्षिक तथा व्यावसायिक जीवनलाई कसरी अझ प्रभावकारी बनाउने भन्ने विषयमा बहस र छलफल गरेका थिए।
उक्त कार्यशालामा विभिन्न वक्ताहरूले बि.आइ.एम विद्यार्थीहरूलाई अत्यावश्यक ठोस कदमहरू चाल्नुपर्ने र कसरी प्रतिस्पर्धात्मक बजारमा आफूलाई उभ्याउन सकिन्छ भन्ने विषयमा विस्तृत जानकारी प्रदान गरेका थिए। कार्यशालाबाट विद्यार्थीहरूले आफ्नो कोर्ससँग सम्बन्धित दस्तावेज निर्माण, व्यवस्थापन, तथा बजारमा आवश्यक रणनीति र व्यवस्थापन कौशलहरूको थप ज्ञान प्राप्त गरेको बताएका छन्।
कार्यक्रममा प्राध्यापक पुष्प राज ओझाले विभिन्न सत्रान्तमा तयार गर्नुपर्ने प्रतिवेदन, प्रयोगात्मक विवरण, प्रोजेक्ट रिपोर्टको एकरूपता तथा महत्वका बारेमा प्रस्तुति दिएका थिए। उनले विद्यार्थीहरूले यी दस्तावेजहरूको महत्व बुझ्नुपर्ने र तिनीहरूको निर्माणमा ध्यान दिनुपर्ने आवश्यकता औंल्याए।
साथै, कार्यक्रम संयोजक धर्मराज भट्टले बि.आइ.एम कार्यक्रमलाई मात्र पाठ्यक्रममा सीमित नराखी, विभिन्न आईटी सम्बन्धी कार्यकलाप तथा अनुसन्धानमा पनि विद्यार्थीहरूको सक्रिय सहभागिता आवश्यक रहेको बताए। उनले विद्यार्थीहरूको लागि हरेक तवरबाट सहजीकरण गर्न आफूले प्रतिबद्धता व्यक्त गरेका थिए।
यस कार्यशालाले विद्यार्थीहरूलाई व्यावसायिक जीवनमा अत्यन्त उपयोगी हुने जानकारी तथा सीप प्रदान गरेकोमा सहभागीहरूले सन्तुष्टि व्यक्त गरेका छन्।
