लामो सफल कार्यकालको निरन्तरता वापत चन्द्रागिरि नगरपालिका १३ स्थित कंकाली मा.वि.का प्रधानाध्यापक विष्णु प्रसाद पनेरु सम्मानित भएका छन् । नेपाल प्रधानाध्यापक संघले राष्टिय सम्मेलनको अवसरमा आज एक कार्यक्रमवीच उक्त सम्मान प्रदान गरेको हो । प्रत्येक प्रदेशबाट एकजना प्र.अ. सम्मानित भएकोमा बाग्मती प्रदेशबाट प्र.अ. पनेरु सम्मानित भएका हुन् । लामो समय सेवा गरेवापत सम्मानित हुनेहरुमा कोशी प्रदेशबाट श्री आर्दश माध्यमिक विद्या मन्दिरका प्र.अ. हेमराज बस्नेत , लुम्बिनी प्रदेशबाट सूर्योदय आधारभुत विद्यालयका प्र.अ. धर्म भटराई , मधेश प्रदेशबाट यज्ञवल्क्य संस्कृत मा.वि.का प्र.अ. संजय कुमार झा , बाग्मती प्रदेशबाट कंकाली मा.वि.का प्र.अ. विष्णु प्रसाद पनेरु र चिरिखर्क आधारभूत विद्यालयका प्र.अ. लिलाधर भुषाल , कर्णाली प्रदेशबाट श्री जीवनज्योति प्रा.वि.का प्र.अ. तिलक राम पौडेल तथा सुदुर पश्चिम प्रदेशबाट श्री निङलासैनी मा.वि.का प्र.अ. भवानी प्रसाद पन्त सम्मानित भएका हुन् ।
विगत ४० वर्षदेखि निरन्तर सफल प्रधानाध्यापकको रुपमा पनेरु सोही विद्यालयमा स्थापना कालदेखि नै अनवरत रुपमा कार्यरत छन् । प्र.अ. विष्णु प्रसाद पनेरुको प्रशासनिक नेतृत्व , कार्यप्रतिको लगाव तथा दृढ संकल्पले सामुदायिक विद्यालयको गुणस्तर उकास्न सफल भएको महसुस अभिभावक , पूर्व विद्यार्थी , स्थानियवासी तथा सरोकारवालाको रहेको छ । प्र.अ. पनेरुकै विद्यालयप्रतिको निरन्तर लगावले विद्यालय हाल नमुना विद्यालयको रुपमा आफ्ना शैक्षिक गतिविधिहरु अगाडी बढाउँदै आएको छ । उहाँकै नेतृत्वमा रहेको कंकाली माध्यमिक विद्यालयले हाल प्राविधिक शिक्षा अन्तर्गत कम्प्युटर इन्जिनियरिङका कक्षाहरु , पढ्दै कमाउँदै कार्यक्रम तथा विभिन्न क्लबमार्फत विद्यार्थीको शैक्षिक विकासमा जोड दिँदै आएको छ ।
