धनगढीः सुदूरपश्चिम प्रदेश सरकारका मन्त्रालयले कर्मचारी सरुवा गर्ने आज अन्तिम दिन हो। सुदूरपश्चिम प्रदेश निजामती सेवा नियमावली, २०८१ को नियम ४६ मा भएको संशोधनअनुसार आज कर्मचारी सरुवा हुने भएको हो।
मुख्यमन्त्री कार्यालयले यसअघि नै कर्मचारी सरुवा गरिसकेको छ। प्रदेशका अन्य मन्त्रालयमा कार्यरत कार्यालय सहयोगी र सवारी चलाक बाहेक समय पुगेको कर्मचारीको सरुवा हुने मुख्यमन्त्री कार्यालयले जनाएको छ।
प्रदेश मन्त्रालयहरूले सहायक चौथोदेखि अधिकृत आठौं तहको कर्मचारीको सरुवा गर्ने छन्। तर राम्रो र मालदार ठानिएको कार्यालयमा सरुवा माग्न कर्मचारीहरूले तीव्र लबिङ गरेको कर्मचारी स्रोतको दाबी छ। विकास बजेट बढी भएको कार्यालयमा सरुवा हुन कर्मचारीहरूले राजनीतिक लविङ बढाएका हुन्।
कर्मचारीहरूले कैलाली र कञ्चनपुरका कार्यालयमा सरूवा माग्न दबाब सिर्जना गरेका छन्। उनीहरूले पहुँचकै आधारमा मालदार कार्यालयमा सरुवा गर्न कुनै कसर बाँकी नराखेको एकजना कर्मचारीले बताए।
सरुवाका लागि हानथाप गर्नेमा लेखा समूहका कर्मचारी अगाडि रहेको एक कर्मचारीले बताए। उनीहरूको पहिलो रोजाइमा प्रदेशका पूर्वाधार विकास कार्यालय, खानेपानी, भूमिगत जलस्रोत तथा सिँचाई विकास डिभिजन कार्यालय, मत्स्य विकास केन्द्र, प्रादेशिक आयुर्वेद चिकित्सालय र मोहना सिँचाइ आयोजना कार्यालय परेका छन्। भनेको कार्यालयमा सरुवा माग्न नेपाली काँग्रेस र नेकपा एमाले निकट कर्मचारीबिच प्रतिस्पर्धा नै चलेको बताइएको छ।
भर्खरै भएको जेन्जी आन्दोलनलाई समेत बिर्सेर राजनीतिक र व्यक्तिगत पहुँच भएका कर्मचारीले आफूले रोजेकै कार्यालयमा सरुवाको निर्णय गराउन कम्मर कसेर लागेको गुनासो पहुँच नभएका कर्मचारीको छ। मन्त्री, नेता तथा उपल्लो तहको कर्मचारीलाई प्रभावमा पारेर मागेकै ठाउँमा सरुवा गर्न कर्मचारीहरूको कुदाकुद चलेको स्वयं कर्मचारीहरूले बताएका छन्।दिनेश खबर बाट साभार
