संघीय संसदबाट पारित गर्न लगिएको विद्यालय शिक्षा सम्बन्धी विद्येयकमा भएका केही अव्यवहारिक र अन्यायपूर्ण प्रावधानहरु विरुद्धको संयुक्त आन्दोलनप्रति इस्टु सुदूर पश्चिम प्रदेश कमिटी तथा इस्टु जिल्ला कमिटीले पनि ऐक्यबद्धता जनाएको छ ।
देशभरका निजी तथा संस्थागत विद्यालयका संगठनहरुको एकतृत आन्दोलन भइरहेको बेला आफ्नो युनियनको तर्फबाट पनि समर्थन रहेको इस्टु सुदूर पश्चिम प्रदेश कमिटी संयोजक धर्मराज भट्टद्धारा हस्ताक्षरित विज्ञप्तिमा जनाइएको छ ।
त्यस्तै , इस्टु कैलालीले पनि विज्ञप्ति प्रकाशित गर्दै सम्पूर्ण निजी विद्यालयमा कार्यरत शिक्षक तथा कर्मचारीलाई आन्दोलनमा सक्रिय सहभागिताको लागि अपिल गरेको छ । लामो प्रतिक्षापछि आउन लागेको विद्येयकले सबैलाई समेटेर लैजानुपर्ने , देशको शिक्षाको ठुलो हिस्सामा सहयोगी भूमिका खेलिरहेको निजी क्षेत्रका विचार पनि समावेश गरिनुपर्ने जिल्ला सचिव पुष्प ओझाले जनाएका छन् ।
संस्थागत विद्यालय शिक्षक युनियन , इस्टु , देशभर रहेका निजी तथा संस्थागत विद्यालयमा कार्यरत शिक्षक तथा कर्मचारीको संगठन हो । शिक्षा सम्बन्धी विद्येयकमा भएका केही प्रावधान संशोधन गर्नुपर्ने भन्दै विभिन्न संस्थागत समितिहरुले देशव्यापी रुपमा चरणबद्ध आन्दोलनका कार्यक्रम घोषणा गरेका छन् ।
