घाेराही दाङ / लुम्बिनी प्रदेश सरकारका स्वास्थ मन्त्री दिपेन्द्र कुमार पुनले प्रतिष्ठानले एमडी पढाई सुरु गरिसकेको र एमबिबिएसको पढाई पनि सुरु गर्ने गरी आफ्नोतर्फबाट तयारी तीव्र तयारी गरेको र छिट्टै संचालन आउने बताउनु भएको छ ।
लुम्बिनी प्रदेश स्वास्थ्य मन्त्रालयले अत्याधुनिक सुविधायुक्त भिडियो एक्सरे मेसिन प्रतिष्ठानलाई हस्तान्तरण गरेको हो । विहीवार एक कार्यक्रमका बिच प्रदेशका स्वास्थ्यमन्त्री दिपेन्द्र पुनले प्रतिष्ठानका उपकुलपति डा. विकास लामिछाने, रजिष्ट्रार प्राध्यापक श्याम लम्साललाई अत्याधुनिक मेसिन हस्तान्तरण गर्नु भएको थियो । सो अवसरमा मन्त्री पुनले मेसिनको उद्घाटन गर्नु भएको थियो । उहाँले अस्पतालको ओपिडी, इमरजेन्सी, सर्जरीलगायत विभिन्न विभागहरुको समेत स्थलगत अवलोकन गर्नुभयो । अवलोकनपछि प्रतिष्ठानमा आयोजित कार्यक्रममा बोल्दै मन्त्री पुनले प्रदेश सरकारको तर्फबाट सुविधा सम्पन्न भिडियो एक्सरे प्रतिष्ठानलाई प्रदान गरेको भन्दै अस्पतालको सेवालाई चुस्तदुरुस्त र बिरामीमैत्री बनाउन आग्रह गर्नुभयो ।
लुम्बिनी प्रदेशमा सरकारी मेडिकल कलेजको रुपमा प्रतिष्ठान रहेको भन्दै मन्त्री पुनले यसको विकासका लागि प्रदेश सरकारले सबैखाले सहयोग गर्ने प्रतिवद्धता गर्नुभयो । उहाँले प्रतिष्ठानले एमडी पढाई सुरु गरिसकेको र एमबिबिएसको पढाई पनि सुरु गर्ने गरी आफ्नोतर्फबाट तयारी तीव्र पारेकाले यसमा पनि प्रदेश सरकारले ल्याब बनाउनेदेखि पूर्वाधारमा केन्द्र सरकारसँग पनि समन्वय गर्ने कुरामा आश्वस्त पार्नुभयो । मन्त्री पुनले एमबिबिएसको आवश्यक तयारीको लागि जिल्ला स्वास्थ्य कार्यालयको भवनलाई प्रयोगमा ल्याउन मन्त्रिस्तरीय निर्णय गरिएको जानकारी दिनुभयो । स्वास्थ्य र प्रतिष्ठानको आपसी समझदारीमा भवनको प्रयोग गर्ने गरी ब्यवस्था मिलाइएको छ ।
