धनगढीः कैलालीको गोदावरीमा लागुऔषधमा संलग्नहरु धमाधम पक्राउ पर्न थालेका छन्।
लागुऔषध सेवन, कारोवार र ओसारपसारमा संलग्नहरु गोदावरी नगर क्षेत्रबाट धमाधम पक्राउ पर्न थालेका हुन्। इलाका प्रहरी कार्यालय मालाखेतीले लागुऔषधमा संलग्नहरुलाई खोजीखोजी नियन्त्रणमा लिन थालेका छ। मालाखेतीले आर्थिक वर्ष २०८०/८१ मा ६६ लागुऔषध मुद्दाका ९८ जनालाई पक्राउ गरेको छ।
साथै इलाका प्रहरी कार्यालय मालाखेती (अत्तरिया) मा एक वर्षको अवधिमा विभिन्न अपराधका तीन सय ८० घटना दर्ता भएका छन्। सो अवधिसम्म सबैभन्दा बढी सार्वजनिक हितविरुद्ध ८४, लागुऔषध ६६, बैंकिङ कसुर ६१, देहत्याग ४५ र आत्महत्या दुरुत्साहनका ४ वटा उजुरी दर्ता भएको इलाका प्रहरी कार्यालय मालाखेतीका प्रहरी नायव उपरीक्षक (डीएसपी) गंगाबहादुर थापाले बताएका छन्।
भवितव्य ज्यान २६, फुटकर ज्यान ८, कर्तव्य ज्यान एक, ज्यान मार्ने उद्योग २, चोरी सम्वन्धि १०, जुवा तीन, ठगी ४, जबरजस्ती करणी १६, जबरजस्ती करणी उद्योग ७, सवारी ज्यान ११ र बहुविवाहका ५ वटा उजुरी दर्ता भएको उनले बताएका हुन्। आर्थिक वर्ष २०७८/७९ मा कुल तीन सय ५३, आर्थिक वर्ष २०७९/८० मा तीन सय ५० र आर्थिक वर्ष २०८०/८१ मा अपराधका घटना बढेर तीन सय ८० पुगेको छ।
तीन सय ८४ जना विरुद्ध मुद्दा चलाइएको डिएसपी थापाले बताए। इलाका प्रहरी कार्यालय मालाखेतीले ७३ ग्राम ६ सय ३ मिलिग्राम लागुऔषध र १३ किलो ३८० ग्राम चरेस बरामद गरेर ६६ मुद्दामा ९८ जनालाई पक्राउ गरेको छ। आर्थिक वर्ष २०८०/८१ को अन्तिम तीन महिनाको अवधिमा मात्र १६ ग्राम २४० मिलिग्राम लागुऔषध र २ सय २३ ग्राम र ४ सय २७ मिलिग्राम चरेससहित २४ मुद्दामा ३३ जनालाई पक्राउ गरिएको डिएसपी थापाले जानकारी गराए।
उनले भन्सार छलीका सामानसहित पाँच जनालाई समेत पक्राउ गरिएको बताए। साथै ४ स ४६ दशमलव १७ क्युफिट अबैध काठसहित ८ जनालाई नियन्त्रणमा लिनुका साथै अबैध नदीजन्य पदार्थ उत्खनन्मा प्रयोग भएका १५ ट्याक्टर, ७ वटा जेसीभी, एउटा टिप्पर, ४ वटा रोल गरी २७ वटा सवारीसाधन नियन्त्रणमा लिएर त्यसबाट ७ लाख १२ हजार गोदावरी नगरपालिकाले राजस्व असुली गरेको डीएसपी थापाले बताए। प्रहरीले अनैतिक क्रियाकलापमा संलग्न ३० महिला, २८ पुरुष र एक जना तेस्रो लिङ्गी गरेर ५९ जनालाई नियन्त्रणमा लिएर कानुनी प्रक्रिया अघि बढाएको छ।
दिनेश खबर बाट साभार
