काठमाडौँ । नेपाली फिल्म क्षेत्रका लागि फागुन महिना सुखद हुन सकेन । प्रतिनिधिसभा निर्वाचनका कारण हलमा दर्शका पातलिए । चुनावकै कारण यस समय आसपास रिलिज भएका फिल्महरू नराम्रोसँग फ्लप भए ।
फागुन १ गते रिलिज भएका ‘बिगुल’, ‘श्री बुकुरोः द होम कलिङ’ र ‘शिवांश’देखि १५ गतेको ‘प्रवासी जीवन’सम्म आइपुग्दा सबै फिल्मको लगानी बालुवामा पानी हालेसरह भयो । तथ्याङ्क अनुसार यी कुनै पनि फिल्मलले बक्स अफिसमा १० लाख ग्रस कलेक्सनसमेत गर्न सकेनन् । केही फिल्महरूका प्रदर्शन मिति नै सरेको छ । शुक्रबार रिलिज भएको ‘लालिमा’को व्यावसायिक रिपोर्ट भने आउन बाँकी छ ।
अब चैतमा ४ वटा ठुला फिल्म आउँदै छन् । चैतको रिलिज क्यालेन्डर हेर्दा सुरुवाती साताहरू केही शान्त देखिए पनि महिनाको अन्त्यमा भने ‘महासंग्राम’ देखिने भएको छ ।
चैतको पहिलो शुक्रबार (६ गते) कुनै पनि नेपाली फिल्म रिलिज हुने छैनन् । यसको मुख्य कारण चैत ५ गते बलिउडको बहुप्रतिक्षित फिल्म ‘धुरन्धर २’ रिलिज हुँदै छ । बलिउडको ठुलो फिल्मसँग जुध्न डराएका कारण नेपाली निर्माताहरूले यो मितिमा फिल्म रिलिज गर्ने आँट नगरेका हुन् । चैत्रको दोस्रो साता अर्थात १३ गते एकमात्र फिल्म ‘हामी तीन भाइ’ आउने तयारीमा छ । यो मितिमा अहिलेसम्म अर्काे रिलिज नहुने देखिएकाले यो फिल्मले एकल प्रदर्शनको अवसर पाउने देखिएकोछ ।
त्यस्तै, तेस्रो साता (२० गते) कुनै पनि फिल्म रिलिजन हुने छैनन् । अन्तिम साता अर्थात् २७ चैत्रमा तीन फिल्म ‘३६ को आँकडा’, ‘राम नाम सत्य’, ‘डल्लेले इन्ट्री मार्यो’ भिड्ने पक्कापक्कीजस्तै छ ।
- ‘हामी तीन भाइ’लाई अवसर
नेपाली फिल्मको व्यापार कम हुनुको धेरैमध्ये एक कारण, एकै पटक धेरै रिलिज हुनु पनि हो । तर ‘हामी तीन भाइ’ एकल रिलिज हुने देखिन्छ, चैत १३ गतेबाट प्रदर्शनमा आउन लागेको यो फिल्म गाउँले परिवेशमा बनाइएको छ । दाजुभाइबिचको भावनात्मक सम्बन्धको कथामा निर्माण भएको छ । निर्देशन मधुसूदन भट्टराई यस फिल्मका निर्देशक हुन् । फिल्मले दाजुभाइको जीवनमा विवाहपछि आउने खटपट र त्यसपछिको सङ्घर्षसमेत देखाउने भट्टराईले बताए ।
प्रसिद्धि सिने आट्र्स प्रालिको ब्यानरमा निर्माण भएको फिल्ममा विनोद न्यौपाने, लक्ष्मी बर्देवा, कुशल विष्ट, रवीन्द्र झा, राजाराम पौडेल, विष्णु सापकोटा (हर्के हल्दार), यादव देवकोटा (सरापे) लगायत कलाकारको अभिनय देख्न सकिन्छ । यो नामबाट सन् २००४ मा फिल्म बनेको थियो, जुन आजसम्म निकै चर्चित छ ।
नयाँ वर्षमा महासंग्राम
नेपाली नयाँ वर्ष फिल्म क्षेत्रका लागि राम्रो मानिन्छ । विगतका वर्षमा यो मितिमा रिलिज भएका धेरै फिल्म व्यावसायिक रूपमा सफल भएका छन् । २०८३ साललाई लक्ष्य गरेर चैत २७ गते तीन वटा ठुला फिल्महरू एकसाथ भिड्दै छन् । यो भिडन्तलाई नेपाली चलचित्र क्षेत्रमा निकै चासोका साथ हेरिएको छ । एकातिर सदावहार अभिनेत्री रेखा थापाको पुनरागमन छ, भने अर्कोतिर एक्सन स्टार विराज भट्टको क्रेज ।
अभिनेत्री रेखा थापाले निर्माण गरेको फिल्म ‘३६ को आँकडा’ सामाजिक विषयवस्तुमा आधारित छ । सवीर श्रेष्ठ निर्देशित फिल्ममा रेखा थापा, पूजा शर्मा, निरूता सिंह, महेश त्रिपाठी र पुष्प खड्कालगायत कलाकारहरू मुख्य भूमिकामा छन् । निरुता यो फिल्ममार्फत वर्षौँपछि हलको पर्दामा देखिन लागेकी हुन् । रेखा थापा पनि यसै फिल्ममार्फत केही समयको अन्तरालपछि पर्दामा देखिँदै छिन् । फिल्मले दर्शकहरूलाई फरक स्वाद दिने निर्देशक श्रेष्ठले बताए ।
‘३६ को आँकडा’ रेखा फिल्मस र काइट्स इन्टरटेन्मेन्टको संयुक्त ब्यानरमा बनेको हो । फिल्म नेपालभर आरआर फिल्मसले वितरण गर्दै छ ।
त्यस्तै, सोही दिन अर्को फिल्म ‘डल्लेले इन्ट्री मार्यो’ पनि प्रदर्शनमा आउँदै छ । यो फिल्म विशेषगरी अभिनेत्री रोशनी खड्काका कारण चर्चामा छ । सन् २०२५ को मिस नेपाल अडिसनमा एउटा हातको हत्केला नभएको विषयलाई लिएर निर्णायक रचना गुरुङको टिप्पणीपछि रोशनी एकाएक भाइरल भएकी थिइन् । उनै साहसी र प्रतिभावान रोशनीले यस फिल्ममार्फत डेब्यु गर्दैछिन् । फिल्ममा सागर लम्साल ‘बले’ पनि हिरोका रूपमा देखिँदै छन् । राजु गिरीको निर्देशन रहेको फिल्मले अपाङ्गता भएका व्यक्तिहरूको क्षमता र समाजको हेराइको कथा उठाएको छ ।
नयाँ वर्षको अर्को ठुलो आकर्षण हो फिल्म ‘राम नाम सत्य’ । ‘१२ गाउँ’ को अपार सफलतापछि विराज भट्ट फेरि एक पटक पर्दामा देखिँदै छन् । माइकल चन्दको निर्देशन रहेको फिल्ममा विराजका अलावा सुशील श्रेष्ठ, दिव्या रायमाझी, सुपुष्पा भट्ट, आयुषसिंह ठकुरी, सुनिल थापा, प्रशान्त ताम्राकार, खुशी कार्कीलगायत कलाकारको अभिनय छ ।
माइकल इन्टरटेन्मेन्टको ब्यानरमा निर्माण भएको यो फिल्ममा उपेन्द्र शाही र स्वेता बिमलीको लगानी छ । किशोर भट्ट, राजेन्द्र भट्ट र अर्जुन सुनार कार्यकारी निर्माता रहेको फिल्मका क्रियटिभ निर्माता मोती कार्की हुन् ।रातोपाटी बाट साभार
