काठमाडौँ : निर्वाचन प्रचारप्रसारका लागि आवश्यक रकम खर्च गर्न हालसम्म ६७१ उम्मेदवारले मात्रै बैंक खाता खोलेका छन्। 
कुल ३ हजार ४०६ जना उम्मेदवारमध्ये ६७१ जनाले मात्रै बैंक खाता खोलेको निर्वाचन आयोगका प्रवक्ता नारायणप्रसाद भट्टराईले जानकारी दिए। यो कुल उम्मेदवारको करिब २० प्रतिशत हो। राजनीतिक दल तथा उम्मेदवारहरूले प्रचारप्रसारका लागि आवश्यक रकम अनिवार्य रूपमा बैंक खातामार्फत जम्मा र खर्च गर्नुपर्ने व्यवस्था आयोगले गरेको छ।
नेपाल राष्ट्रबैंकले बैंक तथा वित्तीय संस्थाहरूलाई उम्मेदवारहरुको बैंक खाता खोल्न सहजीकरण गर्न परिपत्र जारी गरेको छ। हाल देशभर राजनीतिक दल र उम्मेदवारहरूले बैंक खाता खोल्ने प्रक्रिया अघि बढाएको उनले जानकारी दिए। वित्तीय सुशासन कायम गर्ने सन्दर्भमा बैंक तथा वित्तीय संस्थाहरूले आयोगको अपेक्षानुसारको सहयोग गरेको उनको भनाइ छ।
उनले भने, ‘निर्वाचन प्रचारप्रसार गर्न आवश्यक रकम राजनीतिक दल तथा उम्मेदवारहरूले बैंक खातामा जम्मा गर्ने र बैंक खातामार्फत खर्च गर्ने गरी निर्वाचन आयोगले यसअघि काम अघि बढाइसकेको छ। कुल ३ हजार ४०६ जना उम्मेदवारहरूमध्ये ६७१ जनाले बैंकमा खाता खोलिसक्नुभएको छ। त्यो भनेको करिब २० प्रतिशत हो।’
उनले मतदाता शिक्षालाई प्रभावकारी बनाउन बैंक तथा वित्तीय संस्थाले सञ्चालन गर्ने मोबाइल एप, एटीएम मेसिन लगायतका डिजिटल डिस्प्लेहरूमा मतदाता शिक्षा सामग्री समावेश गर्न आयोगले अनुरोध गरेको पनि जानकारी दिए। थाहाखबर बाट साभार
