सरकारी वकिल कार्यालयले काठमाडौंमा एक पुरूषमाथि १३ वर्षीया छोरीलाई बलात्कार गरेको अभियोग लगाएर मुद्दा दर्ता गरेको छ।
सरकारी वकिल कार्यालयले छोरीमाथि बलात्कार गरेको भन्दै ती पुरूषविरूद्ध ‘हाडनातामा जबर्जस्ती करणी’ मुद्दामा मंगलबार जिल्ला अदालत काठमाडौंमा मुद्दा दर्ता गरेको हो।
१३ वर्षीया बालिका बेहोस भएर स्कुलमा ढलेपछि उपचारका लागि वीर अस्पताल पुर्याउँदा उनीमाथि बलात्कार भएको खुलेको सरकारी वकिल कार्यालयले राखेको अभियोग पत्रमा उल्लेख गरिएको छ।
सिन्धुपाल्चोक स्थायी घर भएका बालिकाको परिवार काठमाडौं कालिमाटीमा डेरा गरी बस्दै आएका थिए।
बालिकाको ३७ वर्षीय बुवा गाडी चलाउँछन्। आमा बिहान-बेलुका चिया बेच्छिन्। बालिकाको एक भाइ छ।
१३ वर्षीया बालिका कालिमाटीको एक विद्यालयमा कक्षा-७ मा पढ्छिन्। उनी घरकी जेठी हुन्। बुवाले गाडी चलाउन सिकाउने भन्दै विभिन्न ठाउँमा लिएर जाने गरेको बालिकाले सरकारी वकिल कार्यालयमा दिएको बयानमा बताएकी छन्।
‘गाडी चलाउन सिकाउने भनेर विभिन्न ठाउँमा लिएर जानुहुन्थ्यो, घुम्न जाँदा मेरो साथीहरूलाई गर्लफ्रेन्ड बनाइदिनुपर्यो भनेर भन्नुहुन्थ्यो,’ बालिकाले बयानमा भनेकी छन्, ‘मसँग यौन सम्बन्धी कुरा गर्ने जिस्किने, चिमाट्ने र शरीर छुने गर्नुहुन्थ्यो।’
ती पुरूषले पनि छोरीलाई साथी जस्तो व्यवहार गर्ने, गलफ्रेन्ड बनाउन, शरीरमा छुने र यौन सम्बन्धी कुरा गर्ने गरेको स्वीकार गरी बयान दिएका छन्।
बालिकाले भने बुवाले गरेको यौन दुर्व्यवहारबारे कसैलाई भन्न सकेकी थिइनन्। उनले सुरूआती दिनमा आफूलाई माया गरेको हो या दुर्व्यवहार गरेको भन्नेसमेत थाहा नभएको बताएकी छन्।
बुवाको व्यवहारबारे बालिका अन्यौल नै थिइन्।
२०८२ असोज १३ गते राति १२ बजेतिर घर फर्किँदा बालिका सुतिसकेकी थिइन्।
‘आमा सँगै सुतेको थिएँ, बुवाले खाटबाट उचालेर भुइँमा लगि कपडा खोलेर बलात्कार गर्नुभयो,’ बालिकाले बयानमा भनेकी छन्, ‘चिच्याउन खोज्दा मुख थुन्नुभयो।’
ती पुरूषले पनि आफूले छोरीलाई बलात्कार गरेको स्वीकारेका छन्।
प्रहरी समक्ष उनले आफूले छोरीलाई कसैलाई भनेमा मारेर फालिदिने धम्की दिएको पनि स्वीकारेका छन्।
त्यही डरले बालिकाले आमालाई पनि आफूमाथि भएको घटनाबारे सुनाउन सकेकी थिइनन्। दोस्रो दिन बुवाले माफी मागेर एउटा सेतो चक्की औषधि खुवाएको बालिकाको भनाइ छ।
‘बुवाले मारेर फालिदिने डरले कसैलाई भन्न सकेको थिइनँ। त्यसैले दोस्रो पटक पनि प्रयास गर्नुभयो,’ उनले भनेकी छन्।
बालिकाले बयानमा भनेअनुसार मंसिर १९ गते बिहान पुन: बलात्कारको प्रयास गरेका थिए। एक्लै भएको बेलामा बलात्कार गर्ने मनसायले बेडमा पल्टाई हात थुनेर प्रयास गर्दैगर्दा एक्कासि भाइले ढोका खोल्यो।
भाइले एक्कासि ढोका खोलेपछि बुवा कोठाबाट बाहिर निस्किएर गएको उनले बताइन्।
‘बुवाले पटक/पटक बलात्कार गर्न खोजेको कुराले भित्रभित्र डराइरहेको थिएँ। त्यही कुराले पीरले बेहोस भएर लडेछु,’ उनले भनिन्।
उनी मंसिर २१ गते दिन दिउँसो विद्यालयमै बेहोस भएकी थिइन्। विद्यालयमा बेहोस भएपछि उनलाई उपचारका लागि वीर अस्पताल पुर्याइएको थियो।
अस्पताल पुर्याएपछि स्कुलले उनकी आमालाई जानकारी गराएको हो।
‘अस्पतालमा पुगेपछि चिकित्सकहरूले पनि सोधिरहेका थिए। आमा भेटेपछि साँझ घटनाबारे सबै सुनाएको हुँ,’ बालिकाले भनेकी छन्।
उनले अस्पतालमा आमालाई घटनाबारे जानकारी गराएपछि कानुनी प्रक्रिया अगाडि बढेको हो। बालिकाको बुवालाई मंसिर २६ गते पक्राउ गरेर कानुनी प्रक्रिया अगाडि बढाएको थियो।
मुलुकी अपराध संहिता २०७४ दफा २२० हाडनाता करणी गर्न नहुनेको उपदफा (२) अनुसार जन्माउने आमा छोरोको वा बाबु छोरीको करणी भएमा जन्मकैदको सजाय हुने कानुनी प्रावधान छ।सेतोपाटी बाट साभार
