धनगढीको एसपिए कलेजमा भव्य कार्यक्रमविच आज SPA TECH FEST 0.2 सम्पन्न भएको छ । कैलाली र कंचनपुरका विभिन्न विद्यालय सहभागी रहेको उक्त कार्यक्रमका प्रमुख अतिथि सुदूर पश्चिम प्रदेशका सामाजिक विकास राज्य मन्त्री माननिय सरस्वती खड्का रहनुभएको थियो । विभिन्न १५ वटा प्रतियोगिता तथा प्रदर्शनी रहेको उक्त कार्यक्रमको अध्यक्षता एसपीए रोबोर्टिक्स क्लबका अध्यक्ष जैनुल अल जफर सिद्धिकीले गरेका थिए । विभिन्न विद्यालयका विद्यार्थीहरुले आफ्नो कला प्रदर्शनी तथा प्रतियोगिताहरुमा प्रस्तुत गरेका थिए । कार्यक्रममा मन्तव्य प्रस्तुत गर्दै प्रमुख अतिथि माननिय राज्य मन्त्री खड्काले सुदूर पश्चिम प्रदेशमा रहेका नव प्रवर्तनका कार्यमा सरकारको साथ र समर्थन रहेको बताउनु भयो ।
विभिन्न प्रदर्शनीको स्थलगत अवलोकनका क्रममा अतिथिहरुले विद्यार्थीहरुको सीप , कला , कोलशको खुलेरै प्रशंसा गरेको थिए । उनीहरुमा भविष्यमा रोबोटिक्स् तथा प्रविधि क्षेत्रमा राम्रो योगदान पुगाउने प्रचुर सम्भावना रहेको जनाए । कार्यक्रममा धन्यवाद मन्तव्य प्रस्तुत गर्दै क्याम्पस प्रमुख योगराज गौतमले आगन्तुक विद्यालय तथा सहभागी विद्यार्थीहरुलाई एसपिए क्याम्पसले सदैव यस्ता कार्यक्रमका लागि स्वागत गर्न लालायित रहेका बताए । स्टीम तथा रोबोटिक्सका अलावा विद्यार्थीहरुले विविध मनोरञ्जनात्मक कार्यक्रममा समेत सहभागिता जनाएका थिए ।
यो सँगै क्याम्पसकै होटल व्यवस्थापन संकायका विद्यार्थीले फुड स्टलमार्फत विभिन्न स्वादिला परिकारको स्वाद पस्केका थिए । कार्यक्रममा निर्णायकहरुको तर्फबाट बोल्दै इन्जिनियर किरण भट्टले सबै सहभागि विद्यार्थीहरुको प्रदर्शनी अब्बल रहेको तथा सबैमा उत्तिकै सम्भावना रहेको बताए । कार्यक्रम क्याम्पसका BIM प्राध्यापक पुष्प ओझाले सञ्चालन गरेका थिए ।
