बैतडीमा हरेक बर्ष बेपत्ता हुनेको संख्या बढ्दै गएको छ।
बैतडी।बैतडीमा हरेक बर्ष बेपत्ता हुनेको संख्या बढ्दै गएको छ।जिल्ला प्रहरी कार्यालयको तथ्यांक अनुसार गएको तीन बर्षमा बेपत्ता भएकामध्ये ५२ जना अझै फेला परेका छैनन् ।
आर्थिक बर्ष २०७९\८० मा १ सय ५ जना हराएकोमा ९१ जना फेला परेका थिए।ती मध्ये १४ जनाको अवस्था अझै अज्ञात रहेको जिल्ला प्रहरी कार्यालय बैतडीका प्रवक्ता प्रहरी निरीक्षक बलराम पाण्डेयले जानकारी दिए ।
यस्तै आर्थिक बर्ष २०८०\८१ मा १ सय १५ जना हराएकोमा १ सय १३ जना फेला परेका थिए ।
गत आर्थिक बर्ष २०८१\८२ मा १ सय २२ जना हराएकोमा ८६ जना फेला परेका छन्।बेपत्ता हुनेमा महिला र बालबालिकाको संख्या बढी रहेको प्रहरी निरीक्षक पाण्डेयले बताए।गत आर्थिक बर्षमा ५५ महिला, २७ बालक २९ बालिका र १ एकजना जेष्ठ नागरिक बेपत्ता भएको प्रहरीमा निवेदन परेको थियो।ती मध्ये ८६ जना फेला परेका उनले बताए ।
बेपत्ता भएको समयमा प्रहरीमा निवेदन दिएपनि कतिपयले फेला परेको जानकारी नदिने भएकाले पनि बेपत्ताको तथ्यांक बढ्दै गएको प्रहरीले जनाएको छ ।
बैतडी भारतसँग खुला सीमा भएको जिल्ला भएकाले पनि धेरैजसो भारततर्फ जाने र उतै बस्ने गरेका छन्।सामाजिक सञ्जालको दुरुपयोग लगायतका कारणले पनि बेपत्ता मानिसको संख्या बढ्दै गएको छ ।
प्रहरीले बेला-बेलामा समस्या परेका नागरिकहरुको उद्धार समेत गर्दै आएको छ।ललाईफकाइ र आँफैै पनि सानै उमेरमा भारत जान खोज्ने बालबालिकाहरुको सीमा नाकाबाट उद्धार गर्ने गरिएको प्रहरी निरीक्षक पाण्डेयले बताए।
गत आर्थिक बर्षमा ५ महिला, २ बालक र तीन बालिकाको उद्धार गरी आफन्तको जिम्मा लगाइएको प्रहरी निरीक्षक पाण्डेयले बताए। धनगढी खबर बाट साभार
