बैतडीमा किशोरको मृत्यु घटनाबारे अफवाह फैलाइएको पाइएको छ ।
धनगढी।सुदूरपश्चिम प्रदेशका भौतिक पूर्वाधार विकास मन्त्री सुरेन्द्रबहादुर पाललाई लिएर सामाजिक सञ्जालमा फैलाइएको आरोप असत्य भएको प्रहरीले स्पष्ट पारेको छ।
दलित अभियान्ता खगेन्द्र सुनारले सामाजिक सञ्जालमार्फत मन्त्री पालले बैतडीमा गाडीले किचेर १३ वर्षीय किरण कोलीको हत्या गरेको दाबी गरेका थिए। उनले मन्त्री रक्सीको नशामा रहेको र घटनापछि पीडित परिवारलाई मुख बन्द गर्न पाँच लाख रुपैयाँ दिइएको जस्ता गम्भीर आरोप सार्वजनिक गरेका थिए।
तर, जिल्ला प्रहरी कार्यालय बैतडीले प्रारम्भिक अनुसन्धानमै यी आरोपको सत्यता नभएको जनाएको छ। प्रहरीका अनुसार किरण कोलीको मृत्यु साउन १७ गते बालुवा संकलन गर्ने क्रममा विद्युत् पोलमा करेन्ट लाग्दा भएको हो। प्रहरी निरीक्षक बलराम पाण्डेयका भनाइमा, “यो घटना शुद्ध दुर्घटना हो, हत्या होइन।”
सुनारले सार्वजनिक गरेको ‘पाँच लाख रुपैयाँ पीडित परिवारलाई जबर्जस्ती दिइयो’ भन्ने आरोपबारे वडाध्यक्ष रघुवीर बोहराले स्पष्टीकरण दिएका छन्। उनका अनुसार उक्त रकम समुदायकै पहलमा संकलन गरेर पीडित परिवारको खातामा जम्मा गरिएको हो। रकम संकलन र खातामा जम्मा गर्ने काम आफैं अभियान्ता सुनारले नै गरेका थिए।
यसबीच, मन्त्री पालको सचिवालयले सुनारले सामाजिक सञ्जालमार्फत गरिएको आरोपलाई ‘चरित्र हत्या गर्ने नियत’ भएको भन्दै कानुनी प्रक्रिया अघि बढाउने तयारी गरेको जनाएको छ।धनगढी खबर बाट साभार
