दसैँ नजिकिएसँगै सुदूरपश्चिमका थारू बस्तीहरू सखिया नाचको रौनकले गुञ्जिन थालेका छन्
धनगढी । दसैँ नजिकिएसँगै सुदूरपश्चिमका थारू बस्तीहरू सखिया नाचको रौनकले गुञ्जिन थालेका छन् । परम्परागत रूपमा दसैँ–तिहारको बेला महिलाले सामूहिक रूपमा प्रस्तुत गर्ने यो मौलिक नृत्य अहिले थारू गाउँमा विशेष आकर्षण बनेको छ ।
गोदावरी नगरपालिका-८, फकलपुरका माधव चौधरीका अनुसार साँझपख महिलाहरू एकनासको थारू वेशभूषामा सजिएर मादल र मिजुराको तालमा नाच्न थालेपछि गाउँभरिकै माहोल चाडपर्वमय बनेको छ ।
सखिया नाचमा महिलाले गोलबद्ध भएर तालमेलसहित नाच्ने गर्छन् । ‘मदरिया’ ले बजाउने मादलको ताल अनुसार उनीहरूले विभिन्न शैलीमा प्रस्तुत गर्ने यो नाचलाई सामूहिक मैत्रीको प्रतीक मानिन्छ । थारू महिलाले साथीलाई ‘सखी’ भन्ने भएकाले यो नृत्यलाई ‘सखिया नाच’ भनिएको हो ।
परम्परागत रूपमा दसैँ-तिहारमा सीमित सखिया नाच अहिले विभिन्न सामाजिक कार्यक्रम, मेला र महोत्सवमा पनि प्रस्तुत हुन थालेको छ । यसले थारू समुदायको मौलिक संस्कृति जोगाउन र नयाँ पुस्तामा चिनाउन महत्वपूर्ण योगदान पुर्याइरहेको स्थानीयको भनाइ छ ।धनगढी खबर बाट साभार
