धनगढी: सुदूरपश्चिम प्रदेशको पर्यटन, कृषि, उद्योग र संस्कृतिको प्रवर्द्धन गर्ने उद्देश्यसहित १९ औं संस्करणको सुदूरपश्चिम महोत्सव, २०८२ आगामी मंसिर २२ गतेदेखि पुस २ गतेसम्म धनगढी–१ पशुपति टोलमा आयोजना हुने भएको छ।
कैलाली उद्योग वाणिज्य संघको आयोजनामा हुने यो महोत्सवको तयारी अन्तिम चरणमा पुगेको संघका अध्यक्ष पुष्करराज ओझाले जानकारी दिए। उनका अनुसार, यस वर्षको महोत्सवलाई ‘समृद्ध सुदूरपश्चिम निर्माण अभियान’ अन्तर्गत भव्य र व्यवस्थित रूपमा आयोजना गरिँदैछ।
महोत्सवमा कृषि, उद्योग, हस्तकला, सूचना प्रविधि, इलेक्ट्रोनिक्स, होटल तथा घरेलु उत्पादनसम्बन्धी ५०० भन्दा बढी स्टलहरू रहनेछन्। तीमध्ये स्थानीय उत्पादन र महिला उद्यमशीलतालाई प्रोत्साहन गर्न १५ र कृषिका लागि ४० सहित ५० वटा स्टल निःशुल्क उपलब्ध गराइनेछ।
संघका अनुसार बालबालिका, युवा र परिवारका लागि विशेष मनोरञ्जनात्मक कार्यक्रम, खेलकुद गतिविधि तथा सांस्कृतिक प्रस्तुति महोत्सवको मुख्य आकर्षण हुनेछन्। सामान्य दर्शकका लागि प्रवेश शुल्क एक सय रुपैयाँ तोकिएको छ भने विद्यार्थी र खेलाडीका लागि ५० रुपैयाँ प्रवेश शुल्क तोकिएको छ। ७० वर्षमाथिका जेष्ठ नागरिक र अपाङ्ग व्यक्तिहरूका लागि भने प्रवेश निःशुल्क रहनेछ।
अध्यक्ष ओझाले सुदूरपश्चिमको आर्थिक, सामाजिक र सांस्कृतिक सम्भावनालाई देश–विदेशमा चिनाउने उद्देश्यले महोत्सव आयोजना गरिएको बताए। “महोत्सवले प्रदेशको पर्यटन, कृषि र उद्योग क्षेत्रमा नयाँ लगानी र अवसर ल्याउने विश्वास लिइएको छ,” उनले भने।
महोत्सव सफल बनाउन संघले सबै राजनीतिक दल, सरकारी तथा गैरसरकारी निकाय, सुरक्षाकर्मी, सञ्चारकर्मी, व्यवसायी र आम नागरिकसँग सहकार्यका लागि आग्रह गरेको छ। संघले सुदूरपश्चिम महोत्सव २०८२ ले प्रदेशको पहिचानलाई थप सबल पार्दै सुदूरपश्चिमलाई आर्थिक रूपमा सशक्त बनाउने दिशा लिने विश्वास गरेको छ।दिनेश खबर बाट साभार
