काठमाडौँ । सिंहदरबार परिसरमा बन्दै गरेको नयाँ संसद भवनको पाँचौ म्याद सकिएको छ । तर हालसम्म पनि निर्मााण सम्पन्न हुन नसकेपछि छैटौँ पटक म्याद थप्ने तयारी भइरहेको शहरी विकास तथा भवन निर्माण विभागले जनाएको छ । 
शहरी विकास तथा भवन निर्माण विभागअन्तर्गत विशेष भवन निर्माण आयोजना समन्वय कार्यालयका सूचना अधिकारी रञ्जनकुमार दासले निर्माण व्यवसायीले म्याद थपका लागि निवेदन दिएको जानकारी दिए ।
दासले भने,‘निर्माण व्यवसायीले म्याद थपका लागि निवेदन दिइसकेका छन् । कति समयका लागि म्याद थप्ने वा के–कसरी अघि बढ्नेबारे छलफल भइरहेको छ ।’
छलफलकै चरणमा रहेकाले म्याद थप गरेर कसरी अघि बढ्ने अहिले कुनै जानकारी दिन नसकिने दासले बताए ।
पुस १६ गतेसम्म संसद् भवन निर्माणकाे अन्तिम म्याद भएपनि काम भने सम्पन्न हुन सकेन । यसको समग्र भौतिक प्रगति कति पुग्यो यसबारे पनि अपडेट लिन बाँकी रहेको उनले बताए ।
२०७६ असोज १ गते शिलान्यास भएको १५ दिनपछि अर्थात् असोज १६ गते उक्त भवन निर्माणका लागि आईसीबी (बहुवर्षीय) मोडलमा ठेक्का सम्झौता भएको थियो । तीन वर्षमा निर्माण सम्पन्न गर्ने गरी टुन्डी सेक जेभीसँग उक्त सम्झौता भएको हो ।
प्रारम्भिक सम्झौता अनुसार २०७९ असोज १६ गते निर्माण सम्पन्न हुनुपर्नेमा कोरोना महामारीका कारण ढिलाइ भएको भन्दै पहिलोपटक उक्त ठेक्काको म्याद थपियो । ६ महिना म्याद थप गरिएपछि निर्माण सम्पन्न गर्नुपर्ने म्याद २०८० वैशाख १४ गते कायम भएको थियो ।
पहिलोपटक म्याद सकिँदा निर्माण सम्पन्न नभएपछि कुनै पनि कारणविना दोस्रो पटकका लागि फेरि ६ महिना म्याद थप गरिएको थियो । यसपछि म्याद थपेर २०८० साल असोज १६ गते पुर्याइएको थियो । यो अवधिसम्म जम्मा ६० प्रतिशत प्रगति भएको थियो ।
तेस्रो पटक २०८० असोज २० गतेदेखि सोही वर्षको चैत १९ गतेसम्म म्याद थपिएको थियो । चौथो पटक थपिएको म्याद अनुसार २०८१ चैत १८ गतेसम्म निर्माण सम्पन्न हुनुपर्ने थियो । त्यो म्याद गुज्रिएको पछि २०८२ पुस १६ सम्मका लागि म्याद थपिएको थियो । तर यो म्यादमा पनि सम्पन्न हुन सकेन ।
साथै उक्त भवन निर्माण सम्पन्न हुन नसके आसन्न फागुन २१ चुनाव पछि प्रतिनिसभा बैठक सञ्चालनका लागि भवनको अभाव झेल्नुपर्ने देखिएको छ ।रातोपाटी बाट साभार
