धनगढीस्थित सुदुरपश्चिमाञ्चल क्याम्पसमा बिआइएम अध्ययनरत विद्यार्थीहरुले आज पोखराको एक प्रतिष्ठित आईटी कम्पनी अवलोकन गरेका छन् । एक हप्ते आइटी अध्ययन अवलोकन भ्रमणमा रहेका बिआइएम पाचौँ र छैठौँ सेमेष्टरका विद्यार्थीहरुले यार्सा ल्याब आइटी कम्पनी भ्रमण गरेका हुन् । क्याम्पसमा हासिल गरेको ज्ञान आईटी कम्पनीमा कसरी प्रयोगात्मक रुपमा प्रयोग भइरहेको छ , आइटी बजारको अवस्था के छ , भविष्यमा कस्ता सीप आयमूलक हुन सक्छन् , कुन कुन क्षेत्रमा करिअर बनाउन सकिन्छ आदि जिज्ञासा राखेका थिए ।
यार्सा ल्याब अवलोकनका क्रममा आइटी बजारका विविध पक्षबारे विद्यार्थीले जानकारी लिएको भ्रमणमा विद्यार्थीसँगै सहभागी रहेका बिआइएम कार्यक्रम निर्देशक धर्मराज भट्टले बताउनु भयो । त्यस्तै , आफ्नो कार्यशैली , आफूहरुले आईटी बजारमा गरेको योगदान र भावी रणनीतिबारे विद्यार्थीलाई कार्यक्षेत्रमै अवलोकन गराईएको यार्सा ल्याबका प्रमुख प्राविधिक निर्देशक सरोज सुवेदीले जानकारी दिनुभयो । काठमाडौँ र पोखरामा रहेको उक्त कम्पनीले मोवाइल गेम , एप्लिकेशन , वेव सर्भिस आदिमा सेवा प्रदान गर्दै आएको छ ।
