धनगढीः सुदूरपश्चिम प्रदेशको अस्थायी राजधानी धनगढीको काखमा रहेको जाखोर ताल यतिखेर चरा अवलोकनका लागि महत्वपूर्ण गन्तव्य बनेको छ। कैलालीको धनगढी उपमहानगरपालिका–७, देवहरिया वनस्पति उद्यानमा रहेको यो तालमा विभिन्न प्रजातिका रैथाने र आगन्तुक जलपन्छीको उपस्थितिले जाखोर ताल चरा अवलोकनका लागि महत्वपूर्ण गन्तव्य बनेको हो।
देहरिया वनस्पति उद्यानमा १२.५ हेक्टर क्षेत्रफलमा फैलिएको जाखोर तालमा हरिहाँस, नकटा, सिलसिले हाँस, बगाले सिम कुखुरा, लामऔँले, कुर्मा, कर्रा साउँरी, जलेवा, बकुल्लालगायत विभिन्न प्रजातिका जलपन्छी देखिने गरेका छन्। चरा अवलोकनका लागि विभिन्न ठाउँबाट चराप्रेमी जाखोर ताल पुग्ने गरेका छन्।
धनगढी बजारनजिकै रहेको जाखोर तालमा यस वर्ष १७ प्रजातिका जलपन्छी अभिलेख भएको चराविद् एवं अनुसन्धानकर्मी हिरूलाल डङ्गौराले जानकारी दिए। उनले सहरी क्षेत्रमा यो ताल चरा अवलोकनका लागि निकै महत्वपूर्ण गन्तव्य रहेको उल्लेख गरे। ‘बजार क्षेत्रमा बसोबास गर्ने मानिस बिदाको समय बिताउन र ‘स्ट्रेस फ्री’ हुन जाखोर ताल आउने गरेका छन्,’ डङ्गौराले भने, ‘चरा हेरेमा मनमा छुट्टै आनन्द मिल्छ।’
यो तालमा पछिल्लो समय नेपालमा सङ्कटापन्न नकटा चरासहित सिलसिले हाँसको उपस्थिति निकै राम्रो छ। हाँस जातिको ठुलो नकटा चरा जाखोर तालमा दिनभरि पानीमा आहारविहार गरेको दृश्य आकर्षक देखिन्छ। यसै गरी विभिन्न प्रजातिका चराको आवाजले मन आनन्दित बनाउने गरेको छ। कैलालीमा विभिन्न प्राकृतिक तालमध्ये जाखोर ताल विभिन्न प्रजातिका चरा पाइने महत्वपूर्ण सिमसार रहेको वन अधिकृत लालबहादुर विकले बताए। विगतमा जाखोर तालमा चरालाई मन नपर्ने जलकुम्भीलगायत मिचाहा प्रजाति बढी थियो। दिनेश खबर बाट साभार
