सुदूर पश्चिमको प्रसिद्ध तीर्थस्थल गंगेश्वर धाम अर्थात गहनान क्षेत्रमा श्रीमद् भागवत महायज्ञको आयोजना गरिने भएको छ । डोटी र डडेल्धुरा क्षेत्रको सीमानामा पर्ने उक्त गहनान क्षेत्रमा नवरात्रीको अवसर पारेर यही चैत्र १७ गतेबाट महायज्ञको आयोजना गर्न लागिएको हो ।
स्कन्द पुराणको मानसखण्डमा समेत चर्चा गरिएको उक्त क्षेत्रमा शाकल्य ऋषिले तपस्या गरेको तपोभूमीका रुपमा समेत गहनान क्षेत्रलाई लिने गरिन्छ । विभिन्न देवीदेवता मन्दिरहरु अवस्थित उक्त क्षेत्रमा पौराणिक महत्व बोकेका दुई नदीहरु कौसिक तथा शाकिल्या नदीको संगम पनि रहेको छ । त्यस क्षेत्रको सांस्कृतिक एवम् पर्यटकीय महत्व दर्शाउने हेतुले प्रचार प्रसार तथा प्रवद्र्धन गर्न आवश्यक ठानेर गहनान क्षेत्र विकास समितिले उक्त महायज्ञ आयोजना गर्न लागिएको मूल व्यवथापन तथा समन्वय समिति संयोजक ललित बहादुर बलायरले बताए ।
साथै , उक्त क्षेत्रको दर्शन तथा संगममा स्नान गर्नाले पितृहरुको उद्धार हुने धार्मिक तथा पौराणिक विश्वास रहेकोले सबैमा सहभागिता जनाउन सल्लाहकार समितिका सदस्य भोजराज भट्टले अनुरोध पनि गरेका छन् । उक्त क्षेत्रको धार्मिक , सांस्कृतिक तथा पर्यटकीय महत्व उजागर गर्न विभिन्न देवीदेवता मूर्ति स्थापना , संग्राहालय निर्माण , धर्मशाला निर्माण , गुरुकुल स्थापना देखि अनाथाश्रम तथा वृद्धाश्रम स्थापनासम्मका परिकल्पना गरिएको आयोजकद्धारा प्राप्त सूचना उल्लेख छ । तसर्थ , सो क्षेत्रमा लाग्ने महायज्ञमा सरिक भई दिव्य कार्यको लाभ लिनुहुन आयोजकद्धारा सबैमा अनुरोध समेत गरिएको छ।
