नेपाल शिक्षक महासंघ , प्रदेश आन्दोलन परिचालन समिति , सुदूर पश्चिम प्रदेशद्धारा आज सुदूर पश्चिमको धनगढीमा ध्यानाकर्षण , खबरदारी जुलुश तथा विरोध सभा आयोजना गरिएको छ ।
सबै किसिमका शिक्षकहरुलाई समेट्ने गरी गठन भएको उक्त महासंघ अन्तर्गतको प्रदेश आन्दोलन परिचालन समितिले आज ठिक १२ः०० बजे धनगढीमा भेला भई सो जुलुस तथा मुख्यमन्त्री तथा मन्त्री परिषदको कार्यालयमा पुगी विरोध सभा आयोजना गरेको हो । लामो समयसम्म देशमा शिक्षा ऐन जारी नभइसकेको परिप्रेक्ष्यमा संसदको यसै हिँउदे अधिवेशनबाट शिक्षकका माग सम्बोधन हुने गरी शिक्षा ऐन जारी गर्न दवाब स्वरुप यस विरोध सभाको आयोजना गरिएको समितिले जनाएको छ ।
विभिन्न शिक्षक संघसंगठनका तर्फबाट कार्यक्रमलाई सम्बोधन गर्दै शिक्षक प्रतिनिधिहरुले पञ्चायत कालिन व्यवस्थामा जारी ऐनको आधारमा अबको शिक्षा अगाडि बढ्न नसक्ने बताउदै शिक्षकका पेशागत माग सम्बोधन हुने गरी यथासक्य छिटो शिक्षा ऐन जारी गर्न दवाब दिएका छन् ।
समितिका तर्फबाट प्रदेश सरकारलाई ध्याकर्षण तथा जानकारी पत्र पनि प्रस्तुत गरिएको छ । उक्त सभामा उल्लेख्य रुपमा शिक्षकहरुको सहभागिता रहेको थियो ।
