कैलालीको धनगढीस्थित एसपीए कलेजमा बिएचएम अध्ययनरत निशान्त बुढाऐर ‘मिस्टर नेपाल २०२५’ मा सहभागी भएका छन् । कृष्णपुर नगरपालिका ७, कलुवापुर घर भएका निशान्त पुरुष सौन्दर्य प्रतियोगिता ‘मिस्टर नेपाल २०२५’ मा सहभागी हुने भएका हुन् ।
आफ्नो व्यक्तित्व, शारीरिक तन्दुरुस्ती, बौद्धिक क्षमता र सामाजिक उत्तरदायित्व प्रदर्शन गर्ने अवसर यस प्रतियोगितामार्फत प्राप्त गर्ने गरिन्छ । प्रतियोगिताको मुख्य उद्देश्य प्रतिभाशाली र जिम्मेवार युवालाई पहिचान गर्नुका साथै स्वास्थ्य, फिटनेस र अनुशासनको महत्व समाजमा प्रवर्द्धन गर्नु पनि हो।
बिएचएम चौथो सेमेष्टरमा अध्ययनरत निशान्त हस्पिटालिटी क्षेत्रबाट प्रतिनिधित्व गर्ने भएर पनि उनी टाइटल नजिक पुग्ने प्रबल सम्भावना रहेको विश्वास राख्दै एसपीए कलेजका बिएचएम विभागिय प्रमुख रविन्द्र परियारले शुभकामना व्यक्त गरेका छन् ।
‘मिस्टर नेपाल’ मा सहभागीहरू सामाजिक तथा सांस्कृतिक प्रतिनिधित्व गर्ने भएकाले यसले समाजमा सकारात्मक प्रभाव पार्ने गरेको छ। प्रतियोगितामा नेपालको आन्तरिक पर्यटनको विकासका लागि समेत विभिन्न गतिविधि सञ्चालन हुने आयोजक नेक्स्ट मोडल्स नेपालकी प्रबन्ध निर्देशक यत्ना पाण्डेले जानकारी दिइन् ।
यो प्रतियोगिताले नेपालमा पुरुष सौन्दर्य र फिटनेसप्रतिको नयाँ दृष्टिकोण प्रस्तुत गरेको छ। धेरै युवाले यस प्रतियोगितालाई स्वस्थ जीवनशैली, आत्मअनुशासन र नेतृत्व क्षमताको प्रतीकका रूपमा हेर्न थालेका छन्। २००१ देखि नियमित रुपमा आयोजना हुँदै आएको यो प्रतियोगिता पुरुषहरू सहभागी हुने नेपालकै ठुलो र प्रतिष्ठित प्रतियोगिता हो ।
