धनगढीः सुदूरपश्चिम प्रदेशका भारतसँग जोडिएका सीमा नाकामा रोहिंग्या शरणार्थीको अवैध प्रवेश रोक्न सुरक्षा निकायले चेकजाँच कडा पारेका छन्। त्रिनगर भन्सार नाकासहित विभिन्न नाकामा खटिएका सुरक्षाकर्मीले नेपाल प्रवेश गर्ने व्यक्तिको परिचयपत्र अनिवार्य रूपमा जाँच गर्ने तथा शंका लागेका व्यक्तिहरूसँग विस्तृत विवरण लिने कार्य तीव्र पारेका छन्।
रोहिंग्या शरणार्थीले भारतीय आधारकार्ड बनाएर मजदुरका रूपमा नेपाल छिर्ने गरेको सूचनापछि निगरानी कडाइ गरिएको सुरक्षा अधिकारीहरूले जानकारी दिएका छन्। त्रिनगर सीमा सुरक्षा गुल्मका प्रमुख, शसस्त्र प्रहरी नायब उपरीक्षक धिरेन्द्र शाहका अनुसार भारतीय सुरक्षा निकाय एसएसबीसँग पनि यस्तो सम्भावना देखिए खबर गर्न आग्रह गरिएको छ।
गृहमन्त्री ओमप्रकाश अर्यालले धनगढीमा सुरक्षा गोष्ठीमा सहभागी भई सोमबार त्रिनगर नाका निरीक्षण गरेका थिए। नाकामा चेकजाँच प्रक्रिया कसरी भइरहेको छ भन्नेबारे जानकारी लिँदै उनले चेकजाँच प्रविधि थप विस्तार गर्ने सम्भावनामा चासो देखाएको अधिकारीहरूले बताए।
भारतसँग १०१ किलोमिटर सीमा जोडिएको कैलालीमा पनि खुला सीमा क्षेत्रमा गस्ती बढाइएको सहायक प्रमुख जिल्ला अधिकारी किरण जोशीले बताइन्। कञ्चनपुरको गड्डाचौकी नाकामा समेत पहिलेको भन्दा कडा निगरानी गरिएको प्रमुख जिल्ला अधिकारी लक्ष्मण ढकालले जानकारी दिए। कञ्चनपुरका २४ वटा सीमा सुरक्षा पोष्टले १२९ किलोमिटर खुला सीमामा निगरानी गरिरहेका छन्।
दार्चुला र बैतडीका नाकामा पनि चेकजाँच कडाइ गरिएको छ। बैतडीको जुलाघाट नाकामा परिचयपत्रका आधारमा नाम दर्ता गरी आवतजावत गराइने गरिएको छ। प्रमुख जिल्ला अधिकारी पुण्यबिक्रम पौडेलका अनुसार अवैध प्रवेश रोक्न सुरक्षा सतर्कता थप सुदृढ गरिएको छ।
भारतमा विशेष मतदाता नामावली शुद्धीकरण कार्यक्रम चलिरहेका कारण त्यहाँ बस्दै आएका केही रोहिंग्या नेपाल प्रवेश गरेको सुरक्षा निकायको आकलन छ। हाल नेपालमा करिब ६ सय रोहिंग्या अवैध रूपमा बसेको बताइएको छ।दिनेश खबर बाट साभार
