पोखरा । तनहुँको शुक्लागण्डकीमा एकैदिन ३ जनाको शव फेला परेको छ । दुई पुरुष र एक महिलाको शव फेला परेको प्रहरीले जनाएको छ । शुक्लागण्डकी नगरपालिका ५ कसेरीस्थित शुक्लागण्डकी नगरपालिकाको फोहोर मैला प्रशोधन केन्द्रमा दुई जना पुरुषको शव फेला परेको हो ।
मृतकमध्ये शुक्लागण्डकी नगरपालिका–११ राइपुरका नारायण विकको पहिचान खुलेको छ । फोहोर मैला केन्द्रमै भेटिएका अर्को एक जनाको पहिचान खुलेको छैन ।
अर्को एक जनाको शव जनकल्याण माविको तलपट्टी जङ्गलमा फेला परेको हो । उक्त शव महिलाको भएको इलाका प्रहरी कार्यालय बेलचौताराका प्रमुख प्रहरी निरीक्षक धननारायण श्रेष्ठले जानकारी दिए ।
उनको पनि पहिचान खुल्न सकेको छैन । सबैको शरीरमा चोट भएकाले हत्याको आशङ्का गरिएको छ । प्रहरीले घटनाको अनुसन्धान भइरहेको जनाएको छ । शवहरू सेती नदी किनारमा फेला परेका हुन् ।
प्रहरीको प्रारम्भिक अनुसन्धान अनुसार मृतकमध्ये एक जना सोही फोहोर प्रशोधन केन्द्रमा कार्यरत सुरक्षा गार्ड हुन् । उनी प्रायः केन्द्रको भित्रै बस्ने गरेका थिए, तर उनको शव बाहिर फेला पर्नुले घटनालाई रहस्यमय बनाएको छ ।
अन्य दुई जना खोला किनारमा फोहोर डिपो नजिकै बस्दै आएका व्यक्तिहरू हुन् । मृतकहरूको साथमा परिचय खुल्ने कागजपत्र नभए पनि स्थानीयले उनीहरूको नाम पहिचान गरेको तर प्रहरीले आधिकारिक पुष्टि गर्न बाँकी रहेको जनाएको छ ।
घटनाको प्रकृति शङ्कास्पद देखिएपछि जिल्ला प्रहरी कार्यालय तनहुँका एसपीसहितको टोली, गण्डकी प्रदेशको प्राविधिक टोली र तालिम प्राप्त कुकुर सहितको टोली घटनास्थलमा पुगेर अनुसन्धान अघि बढाएको उनले बताए ।
‘घटना अलि गम्भीर प्रकृतिको देखिएको छ । हामी अहिले अनुसन्धानकै क्रममा छौँ,’ उनले भने, ‘तालिमप्राप्त कुकुर र प्राविधिक टोलीले सूक्ष्म ढङ्गले काम गरिरहेको छ ।’रातोपाटी बाट साभार
