धनगढी: अख्तियार दुरुपयोग अनुसन्धान आयोगले बझाङको बित्थडचिर गाउँपालिका–९ स्थित सुनकुडा माध्यमिक विद्यालयको भवन निर्माणमा २६ लाख ५४ हजार रुपैयाँभन्दा बढी अनियमितता भएको ठहर गर्दै तत्कालीन प्रधानाध्यापकसहित पाँच जनाविरुद्ध विशेष अदालत, काठमाडौंमा भ्रष्टाचार मुद्दा दायर गरेको छ।
अनुसन्धान अनुसार ३ तले १२ कोठे नमूना विद्यालय भवन निर्माणमा सार्वजनिक खरिद ऐनको उल्लंघन गर्दै बोलपत्रबिनै निर्माण गराइएको, वास्तविक कामभन्दा बढी मूल्याङ्कन गरी भुक्तानी गरिएको र नगरेको कामलाई गरेजस्तो देखाइएको पाइएको छ। यस क्रममा सार्वजनिक निर्माणतर्फ १७ लाख ७५ हजार रुपैयाँ र विद्युत् तथा औजार शीर्षकमा २ लाख २६ हजार रुपैयाँभन्दा बढी रकम अनियमित रूपमा भुक्तानी गरिएको छ।
त्यसैगरी, आर्थिक वर्ष २०७६/०७७ र २०७७/०७८ मा कर कट्टा नगरी विद्यालयको आन्तरिक कोषबाट ६ लाख ५२ हजार रुपैयाँभन्दा बढी कर दाखिला गरिएको पाइएको छ।
अनुसन्धानबाट विद्यालयको कुल २६ लाख ५४ हजार ६८३ रुपैयाँ १२ पैसाको सरकारी तथा सार्वजनिक सम्पत्ति हिनामिना, दुरूपयोग तथा गैरकानुनी लाभ लिएको भन्दै अख्तियारले चार्जसिटमा उल्लेख गरेको छ। उक्त कार्य भ्रष्टाचार निवारण ऐन, २०५९ बमोजिम कसूर ठहर गरिएको छ।
अख्तियारका अनुसार विद्यालयका तत्कालीन व्यवस्थापन समिति अध्यक्ष रमेश बहादुर अधिकारी, प्रधानाध्यापक धन बहादुर विष्ट र लेखापाल हर्क बहादुर विष्टविरुद्ध संयुक्त रूपमा २६ लाख ५४ हजार रुपैयाँ बिगो कायम गरिएको छ। यस्तै, गाउँपालिकाका तत्कालीन निमित्त प्रमुख प्रशासकीय अधिकृत रमेश बहादुर विष्ट र सब–इन्जिनियर किरण भण्डारीविरुद्ध २० लाख १ हजार रुपैयाँ बिगो कायम गरी कैद तथा जरिवानाको माग गरिएको छ।
सरकारी तथा सार्वजनिक सम्पत्ति हिनामिना र दुरूपयोग गरेको ठहरसहित सबै प्रतिवादीविरुद्ध बिगो असुल उपर र कानुनअनुसार सजाय माग गर्दै विशेष अदालतमा आरोपपत्र दायर गरिएको अख्तियारले जनाएको छ।दिनेश खबर बाट साभार
