अत्तरिया : कैलालीको गोदावरी नगरपालिका-१० का पदम थापा जबरजस्ती करणीको आरोपमा पक्राउ परेका छन्।
साउन ९ गते राति गोदावरी नगरपालिका-३ की १७ वर्षीया किशोरी लक्ष्मी (नाम परिवर्तन) लाई जंगलमा लगेर बलात्कार गरेको आरोपमा थापा पक्राउ परेका हुन्। पीडित किशोरीले प्रहरीमा उजुरी दिएपछि घट्ना अहिले वाहिर आएको हो ।
जिल्ला प्रहरी कार्यालय कैलालीका प्रमुख प्रहरी उपरीक्षक पदमबहादुर विष्टले साउन १५ गते थापालाई घरबाटै पक्राउ गरिएको जानकारी दिए। थापाले फेसबुकमा फेक आइडी बनाएर लक्ष्मीसँग कुरा गर्दै आइरहेका थिए।
परिचय लुकाएर कुरा गरिरहेका थापाले साउन ९ गते मध्यराति लक्ष्मीलाई घर बाहिर भेट्न बोलाए। लक्ष्मीलाई बाइकमा राखेर राति झण्डै १ः३० बजे गोदावरी नगरपालिका-१० को मालाखेती जंगलमा पुर्याए। थापाले सोही स्थानमा आफ्ना चार जना अन्य साथिहरुलाई समेत बोलाएका थिए।
थापासहित उनका अन्य साथिहरुले मालाखेती जंगलमा लक्ष्मीलाई सामूहिक बलात्कार गरेपछि पुनः घरमै ल्याएर छोडे। लक्ष्मीले आफूमाथि सामूहिक बलात्कार गर्ने कसैलाई पनि चिनेकी थिइनन्।
बलात्कारपछि थापाले पनि फेसबुकबाट ब्लक गरे। पीडित किशोरीले प्रहरीमा उजुरी दिएपछि, प्रहरीले अनुसन्धान थालेको थियो। प्रहरीले लक्ष्मीसंग कुराकानी गरेको फेक एकाउन्टको इमेल पहिचान गरी थापालाई पक्राउ गर्न सफल भएको एसपी विष्टले बताए।
