बैतडीः बैतडी–दार्चुला अवरुद्ध सडकखण्ड सुचारु भएको छ।
आइतबार साँझ ६ देखि अवरुद्ध बनेको दशरथचन्द राजमार्ग सोमबार बिहान १० बजेबाट सञ्चालनमा आएको प्रहरीले जनाएको छ। जिल्ला प्रहरी कार्यालय बैतडीका प्रमुख प्रहरी नायव उपरीक्षक मकेन्द्रकुमार मिश्रका अनुसार अवरुद्ध सडक सुचारु भएपछि यातायातका साधन गन्तव्यतिर लागेका छन्।
बैतडीको पाटन नगरपालिका–४ को जेउडेमा मोड सुधारको क्रममा सडक माथिबाट पहिरो खसेपछि सडक अवरुद्ध बनेको थियो। बिहान ५ बजेदेखि ३ वटा स्काभेटर प्रयोग गरेर १० बजेबाट सडक खुलाइएको हो। अहिले दुवै जिल्लाबाट छुटेका छोटो तथा लामो दुरीका सवारीसाधन चल्न थालेका छन्। दशरथचन्द राजमार्गस्थित जेउडेमा मोड सुधारका लागि कटिङ भइरहेको समयमा आइतबार साँझ ६ बजे माथिबाट पहिरो खसेको थियो।
केशर कन्ट्रक्सनले मोड सुधारको काम गरिरहेको थियो। सोही क्रममा पहिरो खसेर सडक अवरुद्ध बन्न पुगेको थियो। त्यसपछि बैतडी र दार्चुलाबाट छुटेका छोटो तथा लामो दूरीका सवारीसाधन आइतबार रातभरी बिच बाटोमै रोकिन पुगेका थिए। अहिले भने एकतर्फी रुपमा भए पनि सवारीसाधन सञ्चालन भएको प्रहरीले बताएको छ।दिनेश खबर बाट शाभार
