नवलपरासीः पूर्वपश्चिम राजमार्गअन्तर्गत दाउन्ने सडकखण्ड आज बिहानदेखि एकतर्फी सवारी संचालनमा आएको छ।
वर्षासँगै शुक्रबारदेखि अवरुद्ध भएको नवलपरासी पूर्वको विनयी त्रिवेणी गाउँपालिका–२ स्थित दाउन्ने खण्ड आज बिहानदेखि एकतर्फी सञ्चालनमा आएको हो।
जिल्ला प्रहरी कार्यालयका नवलपरासी पूर्वका प्रहरी उपरीक्षक (एसपी) युवराज खड्काकाअनुसार आज बिहानदेखि सडकमा पालैपालो सवारी सञ्चालन गरिएको छ। अहिले दुम्कीबासको ज्यामिरेसम्म करिब पाँच किलोमिटर सवारीको जाम रहेको छ। तीन दिनदेखि सडक अबरुद्ध हुँदा यात्रुहरु अलपत्र परेका छन्।
विस्तारका क्रममा रहेको दाउन्ने सडकखण्डमा वर्षा भएसँगै सडक चिप्लो र हिलो भएर यातायात अवरुद्ध हुँदै आएको छ। सडकमा हिलो भएकोले सवारी साधनलाई दाउन्नेको उकालो पार गर्न समस्या भएको प्रहरीले जनाएको छ।
नारायणगढ–बुटवल सडकखण्डको अधिकाशं भाग कालोपत्र भएपनि दाउन्नेको करिब चार किलोमिटर सडक निर्माणको काम पूरा नहुँदा यात्रुले सास्ती भोग्दै आएका छन्।थाहाखबर बाट साभार
