सुदूर पश्चिमाञ्चल एकेडेमी (एसपीए कलेज)ले ‘अपि शिक्षा परियोजना’ अन्तर्गत २ जना जेहेन्दार विद्यार्थीलाई कक्षा ११ देखि स्नातक तहसम्मको अध्ययनका लागि पूर्ण छात्रवृत्ति (आवाससहित) प्रदान गर्ने घोषणा गरेको छ।
यो छात्रवृत्ति कार्यक्रम अक्सफोर्ड, इंग्ल्यान्डका वाल्टर्स दम्पतीद्वारा प्रायोजित गरिएको हो, जसले सुदूरपश्चिमका ग्रामीण विद्यार्थीहरूको क्षमता र संघर्ष देखेर यो पहल सुरु गरेका थिए। यस कार्यक्रमले ६ वर्षसम्म निरन्तरता पाउनेछ र इच्छुक विद्यार्थीहरूले २०८२ सालको असार महिनाको १५ गतेसम्म आवेदन दिन सक्नेछन्।
यस छात्रवृत्तिमा प्राथमिकता मानविकी संकायका विद्यार्थीहरूलाई दिइनेछ। यो छात्रवृत्ति अध्ययनका लागि वित्तीय सहायता प्रदान गर्नुका साथै योग्य विद्यार्थीहरूलाई इंग्ल्यान्ड जान्ने अवसर समेत प्रदान गर्नेछ।
यस छात्रवृत्ति कार्यक्रमको उद्देश्य ग्रामीण भेगमा रहेका प्रतिभाशाली विद्यार्थीहरूको शिक्षा सपनाहरू पुरा गर्न र सुदूरपश्चिम क्षेत्रको शिक्षा क्षेत्रमा एक नयाँ युगको शुरुवात गर्ने रहेको कलेजले विश्वास व्यक्त गरेको छ।
