इरान सरकारले प्रतिबन्धित विपक्षी समूह मोजाहिदिन-ए-खलक (एमइके) का दुई सदस्यलाई मृत्युदण्ड दिएको छ।
घरेलु हतियार प्रयोग गरेर सर्वसाधारण र सार्वजनिक संरचनामा आक्रमण गरेको आरोपमा दोषी ठहर भएका बेहरुज एहसानी-इस्लामलु र मेहदी हसनीलाई इरानले आइतबार मृत्युदण्ड दिएको हो।
६९ वर्षका बेहरूज र ४८ वर्षका मेहदीलाई इरानी अदालतले २०२४ को सेप्टेम्बरमै दोषी ठहर गरेको थियो।
फैसला पुनरवलोकनका लागि उनीहरूले गरेको माग उच्च अदालतले अस्वीकार गरिदिएको थियो।
सरकारी सञ्चारमाध्यम मिजानका अनुसार, उनीहरूले समूहको निर्देशनमा मोर्टार र प्रक्षेपक बनाएर नागरिक, आवासीय भवन, सेवा केन्द्र, विद्यालय र च्यारिटी संस्थामा आक्रमण गरेका थिए।
अदालतले उनीहरूलाई ‘मोहरबेह’ अर्थात् ईश्वरविरुद्ध युद्ध छेडेको, आतङ्ककारी समूहको सदस्यता लिएको र सार्वजनिक सम्पत्ति नष्ट गरेको अभियोगमा दोषी ठहर गरेको अन्तर्राष्ट्रिय समाचार संस्था रोयटर्सले जनाएको छ।
अन्तर्राष्ट्रिय मानव अधिकार संस्था एम्नेस्टी इन्टरनेशनलले यो मुद्दालाई अत्यन्तै अन्यायपूर्ण भन्दै कडा आलोचना गरेको छ।
हसनी र इस्लाम्लूलाई २०२२ मा पक्राउ गरिएको थियो। उनीहरूलाई वकिल राख्न नदिइएको र बयानको क्रममा उनीहरूलाई यातना दिएर जबर्जस्ती आरोप स्वीकार्न बाध्य पारिएको आरोप लगाइएको छ।
मोजाहिदिन-ए-खलक समूहका नेतृ मरियम राजवीले मृत्युदण्ड पाएका कार्यकर्ताको प्रशंसा गर्दै उनीहरूले तीन वर्षसम्म यातना र दबाबबीच पनि प्रतिज्ञा निभाएको बताएकी छन्।
संयुक्त राष्ट्रसंघका अनुसार, सन् २०२४ मा मात्रै इरानले कम्तीमा ९०१ जनालाई मृत्युदण्ड दिएको छ। जुन २०१५ यताकै सबैभन्दा उच्च संख्या हो।
एमइके समूहले सन् १९७० को दशकमा इरानका शाह र अमेरिकी संरचनामा आक्रमण गरिरहेको थियो।
१९७९ को इस्लामिक क्रान्तिपछि एमइकेलाई आयातोल्लाह रुहोल्लाह खामेनी नेतृत्वको सरकारले उनीहरुको विचार र कार्यशैलीप्रति अस्वीकार गरिदिएको थियो।
त्यसपछि एमइकेले सत्ता साझेदारीको माग गर्दै सरकारविरुद्ध प्रदर्शन मात्र होइन, हिंसात्मक आक्रमण सुरु गरेको थियो।
सन् १९८१ मा एमइकेका कार्यकर्ताले संसद भवनमा बम विस्फोट गराएर इरानी राष्ट्रपति मोहम्मद अली राजाई र प्रधानमन्त्री मोहम्मद जवाद बाहोनरको हत्या गरेको थियो।
त्यसपछि संगठनमाथि आतङ्ककारी गतिविधि संचालन गरेको आरोप लागेको थियो। अमेरिका र युरोपेली संघले एमइकेलाई २०१२ सम्म आतंककारीको सूचीमा राखेको थियो।सेतो पाटी बाट साभार
