फागुन २१ गते हुने प्रतिनिधिसभा सदस्य निर्वाचनमा एकता गरेर जाने उद्देश्यका साथ नेपाली कम्युनिस्ट पार्टी (नेकपा) र नेकपा माओवादीबिच सघन छलफल सुरु भएको छ । 
कात्तिक १९ गते तत्कालीन नेकपा माओवादी केन्द्र, नेकपा एकीकृत समाजवादी लगायत १० घटक मिलेर नेकपा बनेपछि विप्लव नेतृत्वको साबिक नेपाल कम्युनिस्ट पार्टी एकता प्रक्रियाबाट बाहिरिएको थियो । त्यसपछि निर्वाचन आयोगमा दल दर्ता गर्ने समयमा विप्लवले नाम परिवर्तन गरी जनयुद्धकालीन नाम माओवादी राखेका थिए ।
तर, निर्वाचनको माध्यमबाट नेपालमा कम्युनिस्ट पार्टीलाई घेराबन्दी गर्ने, कमजोर बनाउने र सखाप पार्ने हिसाबले षड्यन्त्र भइरहेको निष्कर्ष निकाल्दै यी दुई पार्टी फेरि नजिकिएको स्रोतले दाबी गरेको छ । माघ ६ गते प्रत्यक्षतर्फको उम्मेदवारी मनोनयन दर्ता गर्ने समय अगाडि नै ‘ब्रेक थ्रु’ हुने गरी दुवै पार्टीका शीर्ष नेताहरू सक्रिय रहेको बुझिएको छ ।
‘नेकपा माओवादीसँग एकता, सहकार्य गर्ने विषयमा छलफल एकदम सकारात्मक रूपमा अगाडि बढेको छ । केही दिनदेखि हामी लगातार छलफलमै छौँ’, स्रोतले भन्यो, ‘कम्युनिस्ट पार्टीलाई कमजोर बनाउन चौतर्फी घेराबन्दी भइरहेको छ । समय र वस्तुनिष्ठ आवश्यकताले पनि सबै वामपन्थी, समाजवादी र कम्युनिस्ट घटकहरू एक ठाउँमा आउनुपर्ने बाध्यता छ । केही दिनमै सकारात्मक परिणाम निस्कनेछ ।’
समानुपातिक बन्दसूची मिलाउनका लागि माओवादीका महासचिव विप्लव लगायत शीर्ष नेताहरू अहिले काठमाडौँमै रहेका छन् । माओवादीबाट विप्लव आफै वार्तामा अग्रसर रहेका छन् । नेकपाबाट संयोजक पुष्पकमल दाहाल प्रचण्डका विश्वास पात्र खटिएको बुझिएको छ ।
केही दिन अगाडि विप्लव र नेकपाका नेता कृष्णबहादुर महराबिच खुमलटारमा छलफल भएको थियो । महराकै पहलमा विप्लव २०७९ सालमा समाजवादी मोर्चामा सहभागी भएका थिए । तत्कालीन माओवादी केन्द्रसँग पार्टी एकता गर्ने सहमति नजिक पुगेर पनि प्रचण्डकै कारण सफल नभएको विप्लवले आरोप लगाएका थिए ।
मोर्चाका संयोजक समेत रहेका विप्लवले नेकपा गठन भएपछि अलग भएका थिए । तर, उनका सचिवालयले गुरु र चेलाको हिसाबले महरासँग भेटघाट हुनु स्वाभाविक भएको बताएको छ ।
‘केही दिनअघि हाम्रा महासचिव महरा सरसँग उहाँकै निवासमा भेट भएको हो । तर पार्टी एकताको विषयमा छलफल भएको छैन । देशी विदेशी प्रतिक्रियावादी शक्तिहरूले नेपालमा कम्युनिस्टलाई समाप्त पार्न विभिन्न षड्यन्त्र गरिरहेका छन् । यस्तो अवस्थामा सम्पूर्ण वामपन्थी र कम्युनिस्ट घटकबिच सहकार्य र मोर्चाबन्दी बनाएर जाऊँ भन्नेबारे कुरा भएको छ । एउटै कम्युनिस्ट केन्द्र बनाएर जाने विषयमा हाम्रो विमति छैन’, विप्लवको सचिवालयले भन्यो ।
माओवादीका स्थायी समिति सदस्य सन्तोष बुढामगरले चुनावी तालमेल, सहकार्य र एकताको विषयमा नेकपाका नेताहरूसँग छलफल भएको स्विकारेका छन् । यद्यपि छलफल कुनै निष्कर्षमा नपुगेको उनले बताए ।
‘हामी सबै वामपन्थी र कम्युनिस्ट घटक एक भएर जाने पक्षमा छौँ । सकेसम्म आगामी निर्वाचनमा सहकार्य र तालमेल गरेर जानेबारे छलफल भइरहेको छ । सहमत नभएमा हामी आफ्नै हिसाबले अगाडि बढ्छौँ’, उनले भने ।
पुस १३ गते नेकपाका संयोजक प्रचण्डले केन्द्रीय कार्यालय पेरिसडाँडामा दुई तीनवटा दलसँग पार्टी एकताका लागि कम्मर कसेर लागेको बताएका थिए । भोलिपल्ट रञ्जिता श्रेष्ठ नेतृत्वको नागरिक उन्मुक्ति पार्टीसँग पार्टी एकता सहमतिमा हस्ताक्षर भएको थियो ।
राजनीतिक दलहरूले निर्वाचन आयोगमा पेस गरेको समानुपातिक बन्दसूची संशोधन गर्नका लागि पुस २१ देखि २७ गतेसम्म समय दिएको छ । यस अवधिमा सकेसम्म एकता गर्ने वा नसकिए निर्वाचनमा सहकार्य गरेर मात्रै जाने विषयमा छलफल केन्द्रित रहेको बुझिएको छ ।
प्रत्यक्षतर्फ उम्मेदवारी दिने समय आयोगले माघ ६ गते तोकेको छ । कालीकोटबाट नेकपाले प्रचण्डको एकल नाम सिफारिस गरेर पठाउनुको उद्देश्य पनि दुई पार्टीबिच सहमति भएमा चुनावी तालमेल गर्न सकिने गरी होल्ड गरिएको चर्चा चलेको छ ।
कालिकोट माओवादीका प्रवक्ता खड्गबहादुर विश्वकर्माको जिल्ला हो । कर्णालीका पूर्वमुख्यमन्त्री तथा नेकपाका नेता महेन्द्रबहादुर शाहीले विप्लव एकता प्रक्रियामा आए आफू त्याग गर्न तयार भएको बताएका थिए । रातोपाटी बाट साभार
