काठमाडौँ : नेपाली काँग्रेसका सांसद पदम परियारले रास्वपा नेता रवि लामिछानेको मुद्दा फिर्ता लिएर प्रधानमन्त्री सुशीला कार्कीले गल्ती गरेको दावी गरेका छन्।
बुधवार बसेको राष्ट्रियसभाको बैठकमा शून्य समयमा बोल्दै उनले प्रधानमन्त्रीका काम शंकास्पद रहेको आरोप लगाएका छन्।
उनले राष्ट्रिय स्वतन्त्र पार्टी (रास्वपा)का सभापति रवि लामिछानेको मुद्दा फिर्ता लिने निर्णयको उनले विरोध गरे।
मतदाताको करोडौँ रुपैयाँ ठगी गरेको अभियोगमा अदालतको फैसलाअनुसार जेल सजाय भोगिरहेका उम्मेदवारको मुद्दा फिर्ता लिने विवादास्पद र शंकास्पद निर्णय गरेर नागरिक सरकारले दलीय पक्षधरता लिएको उनको आरोप छ।
गैरआवासीय नेपाली संघको महाविधेशनको आयोजक सरकार रहने विषमा असन्तुष्टि जनाए। गैरआवासीय नेपाली संघ (एनआरएनए)को निर्वाचन स्वयं सरकार आयोजक बसेर निर्वाचनको मुखमा गरिनु पनि उपयुक्त नभएको उनको भनाइ छ।
यस्तै निर्णयले सरकार कुनै अमुक दल वा उम्मेदवारतर्फ क्रमशः पक्षधर बन्दै गएको त होइन भन्ने प्रश्न उठ्न थालेको उनले बताए।
परियारले भने, ‘मतदाताको करोडौँ सम्पत्ति ठगी गरेको आरोपमा अदालतको फैसलाअनुसार जेल बसेका उम्मेदवारको मुद्दा फिर्ता लिने विवादास्पद निर्णय सरकारले गरेको छ। गैरआवासीय नेपाली संघको निर्वाचन सरकारले आयोजक बसेर निर्वाचनको सम्मुखमा गर्न लागिरहेको छ। यस्तै निर्णयले सरकारले चुनावमा नजानिँदो पाराले अमुक दल र उम्मेदवारतर्फ क्रमशः पक्षधरता देखाउँदै गएको त होइन?’
उनले विवादास्पद निर्णय पुनर्विचार गर्न तथा राज्य संयन्त्रलाई तटस्थ ढंगले परिचालन गर्न सरकारसँग माग गरे।थाहाखबर बाट साभार
