काठमाडौँ । फागुन २१ को प्रतिनिधि सभा सदस्य निर्वाचनमा खासखास क्षेत्रमा चुनावी तालमेलका लागि गरेको प्रस्ताव अन्य पार्टीले अस्वीकार गरेपछि एमाले अप्ठेरोमा परेको छ । कांग्रेस र नेकपाले तालमेलको प्रस्ताव अस्वीकार गरेपछि खासखास क्षेत्रमा चुनावी तालमेल गर्ने एमाले अध्यक्ष केपी ओलीको चाहाना पुरा नहुने भएपछि एमालेलाई अप्ठेरो पर्ने देखिएको हो ।
‘खासखास क्षेत्रमा एमालेले चुनावी तालमेलको प्रस्ताव गरेको थियो तर नेकपाले उक्त प्रस्ताव अस्वीकार गरेको छ’, नेकपाका नेता प्रकाश ज्वालाले रातोपाटीसँग भने, ‘पार्टी संयोजक प्रचण्ड र सहसंयोजक माधव नेपालले एमालेको प्रस्तावमा नलाग्ने भन्नु भएको छ ।’ प्रचण्ड र माधवले एमालेबाट आएको तालमेलको प्रस्तावबारे केही दिन अघि बैठकमा ब्रिफिङ गर्दै तालमेल नगर्ने निष्कर्ष सुनाएका थिए ।
एक्लै निर्वाचन लड्ने घोषणासहित माघ ६ गते उम्मेदवारी दर्ता गरेका कांग्रेस, एमाले र नेकपाले मतदान मिति नजिकिँदै जाँदा निश्चित निर्वाचन क्षेत्रहरूमा चुनावी तालमेलको प्रयास गरेका थिए । त्यसका लागि एमाले अध्यक्ष केपी शर्मा ओलीले कांग्रेसका पूर्व सभापति शेरबहादुर देउवा र नेपाली कम्युनिस्ट पार्टीका संयोजक पुष्पकमल दाहाल प्रचण्डसँग प्रस्ताव गरेका थिए ।
कांग्रेसको विशेष महाधिवेशनपछि कांग्रेसको नेतृत्व गगन थापाले सम्हाल्दै आएका छन् । तर थापा पहिलेदेखि नै चुनावी तालमेलको विपक्षमा छन् । यस्तो अवस्थामा देउवा तालमेलका लागि सकारात्मक भए पनि पार्टीमा देउवाको हैसियत कमजोर छ ।
चुनावी तालमेलको चर्चा भइरहेका बेला कांग्रेसले निर्वाचनपूर्व कुनै पनि दलसँग गठबन्धन नगर्ने पत्रकार सम्मेलन गरेरै स्पष्ट पारेको छ ।
कांग्रेस केन्द्रीय प्रचारप्रसार समितिले बिहीबार गरेको पत्रकार सम्मेलनमा पार्टीका प्रवक्ता देवराज चालिसेले कांग्रेस एक्लै चुनावी मैदानमा उत्रिएको र १६५ निर्वाचन क्षेत्रमा आफ्ना उम्मेदवार चुनावी मैदानमा होमिएकाले चुनावअघि तालमेल गर्ने नीति नभएको प्रस्ट पारेका हुन् ।
‘निर्वाचनपूर्व कुनै किसिमको गठबन्धन वा चुनावी तालमेल कांग्रेसले गर्दैन । अब कांग्रेस एक्लै आफ्नै बलमा चुनावमा प्रतिस्पर्धा गर्छ’, प्रवक्ता चालिसेको भनाई छ ।
उता, नेकपाका अध्यक्ष प्रचण्डले पनि कुनै पनि पार्टीसँग चुनावी तालमेल नहुने पार्टी बैठकमै ब्रिफिङ गरिसकेका छन् । ‘देशभर हाम्रो पार्टीको पक्षमा चुनावी माहौल राम्रो बन्दै गएको छ । सबै जनाले अझ मेहनत गरेको खण्डमा एक नम्बरको पार्टी बन्छ । अहिले एमाले वा कांग्रेस कुनै पार्टीसँग चुनावी तालमेलबारे कुराकानी भएको छैन’, प्रचण्डको भनाइ उद्धृत गर्दै नेता राजेन्द्र श्रेष्ठले भने ।
बुधबार पार्टी कार्यालय च्यासलमा आयोजित पत्रकार सम्मेलनमा एमाले उपाध्यक्ष रामबहादुर थापा ‘बादल’ले देश जलाउनेकाविरुद्ध जाने राजनीतिक दलहरूसँग चुनावी सहकार्य गर्ने पार्टीको नीति रहेको खुलासा गरेका थिए ।
‘देश जलाउनेहरुकाविरुद्ध हुने दलहरूसँग चुनावी सहकार्य गर्न सकिन्छ भन्ने पार्टीको नीति छ’, बादलले भनेका थिए, ‘१६५ निर्वाचन क्षेत्रहरूमध्ये जहाँ जहाँ देश जलाउनेहरूका विरुद्ध जान तयार हुने दलहरू छन् । दुवै पक्षको हित हेरेर निश्चित निर्वाचन क्षेत्रमा विनविनको अवस्थामा सहकार्य हुनसक्छ ।’
यसै क्रममा जनार्दन शर्मा र बाबुराम भट्टराईले नेतृत्व गरेको पार्टी प्रलोपासँग सहकार्यका लागि सहमति भइसकेको उपाध्यक्ष थापाको भनाइ थियो ।
‘अरूसँग पनि कतिपय निर्वाचन क्षेत्रमा सहकार्य हुनसक्छ । त्यसबारे छलफल पनि भइरहेको छ’, थापाले भनेका थिए, ‘फागुन २१ अघिसम्म सबै पक्षहरूबाट प्रयत्न जारी रहन्छ र अन्तिम समयमा केही ठाउँहरूमा सहकार्यका लागि सहमति हुनसक्छ ।’
तर नेकपा र कांग्रेसले फागुन २१ सम्म आफ्नो अडान नफेरेको खण्डमा चुनावी तालमेल गर्ने एमालेको चाहाना पुरा हुने देखिँदैन ।
खास गरी अध्यक्ष ओलीको निर्वाचन क्षेत्र झापा–५ र महासचिव शङ्कर पोखरेलको निर्वाचन क्षेत्र दाङ–२ मा अन्य दलसँग एमाले चुनावी तालमेलको पक्षमा छ । झापा–५ मा राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाह ओलीसँग प्रतिस्पर्धामा उत्रेका छन् । रास्वपाको लहर बढ्दै गएको ठहरसहित ओलीले आफ्नो र महासचिव पोखरेलको क्षेत्रमा नेकपा र कांग्रेसमध्ये कुनै एक दलसँग तालमेल गरेर जीत सुनिश्चित गर्न चाहेका छन् ।
अघिल्लो निर्वाचनमा ओलीले झापामा राप्रपासँग चुनावी तालमेल गरेका थिए । तर यो पटक राप्रपाले पनि चुनावी तालमेल नगर्ने बताउँदै आएको छ । राप्रपा र नेकपा दुवैले तालमेल नगर्ने भएपछि झापामा ओलीलाई चुनावमा धक्का लाग्नसक्ने त्रास छ भने दाङमा महासचिव शङ्कर पोखरेललाई पनि चुनौती रहेको बताइएको छ । रातोपाटी बाट साभार
