धनगढी: कैलाली भन्सार कार्यालयले आर्थिक वर्ष २०८०/८१ मा सात अर्ब ९१ करोड ८० लाख राजस्व सङ्कलन गरेको छ। कार्यालयलाई सो आवमा एघार अर्ब ५८ करोड २४ लाख राजस्व सङ्कलनको वार्षिक लक्ष्य दिइएको थियो।
सूचना अधिकारी पवित्रकुमार खड्काका अनुसार सवारीसाधन, पेट्रोलियम पदार्थ, निर्माण सामग्री, हार्डवेयरका सामान, खाद्यान्न, तरकारी, कपडालगायतका सामानको आयात घटेकाले लक्ष्यअनुसार राजस्व सङ्कलन गर्न नसकिएको हो।
आव २०८०/८१ मा भन्सार महसुलबापत तीन अर्ब एक करोड, मूल्य अभिवृद्धि करबापत तीन अर्ब १७ करोड, अन्तः शुल्कबापत २० करोड ४४ लाख र अन्य शुल्कबापत एक अर्ब ५२ करोड राजस्व सङ्कलन भएको उनले बताए। कार्यालयले आव २०८०/८१ मा लक्ष्यको ६८ दशमलव ३६ प्रतिशत मात्रै राजस्व सङ्कलन गर्न सकेको छ।
भन्सार कार्यालयको तथ्याङ्क अनुसार, आव २०७९/८० मा आठ अर्ब २९ करोड, आव २०७८/७९ मा नौ अर्ब ५८ करोड, आव २०७७/७८ मा आठ अर्ब ८४ करोड र आव २०७६/७७ मा कोभिड-१९ महामारीका कारण चार अर्ब ९२ करोड मात्रै राजस्व सङ्कलन भएको थियो। आव २०७५/७६ मा भने पाँच अर्ब १९ करोड राजस्व सङ्कलन भएको थियो।
