धनगढी: नेपाल उद्योग वाणिज्य महासंघका अध्यक्ष चन्द्रप्रसाद ढकालले सुदूरपश्चिममा केबलकार सहितको रिसोर्ट सञ्चालनमा ल्याउने भएका छन्। ढकालले कैलालीको चिसापानी क्षेत्रमा केबलकार बनाउन लागेका हुन्।
त्यसकै सिलसिलामा आज बिहान कैलालीको चिसापानी क्षेत्रको पहाडी भूभागतिर ढकाल ट्रेकिङमा गएका थिए।उनले राजमार्गसँगैको चिसापानीदेखि राजकाँडासम्म उनले लौरो टेकेर यात्रा गरेका थिए।
करिब साढे तीन घण्टा लामो ट्रेकिङ गर्दै उनी राजकाँडा पुगेको बताइन्छ। सोही स्थानमा उनी अध्यक्ष रहेको आईएमई ग्रुपले केबलकार र रिसोर्ट निर्माण गरिरहेको छ। जाल्पादेवी केबलकार निर्माणपछि सो क्षेत्रमा आन्तरिक तथा वाह्य पर्यटन प्रवर्धन हुने ढकालको विश्वास छ।
तर ढकालले सो क्षेत्रमा आफ्नो योजना लागू गराउन घुस दिनेदेखि शक्तिकेन्द्रलाई खुसामद गराउनेसम्मको हतकन्डा अपनाएको पनि खुलेको छ। उच्च स्रोतका अनुसार ढकालले वनका कर्मचारीलाई रुख कटान आदेशका लागि घुस दिएको खुलेको छ।
ढकालले निर्माणका लागि रुख कटानमा ढिलाई हुने देखिएपछि घुस दिएर काम फत्ते गरेको बताइन्छ। त्यसका लागि उनले तत्कालीन प्रधानमन्त्री पुष्पकमल दाहाल प्रचण्डलाई पनि रिझाएका थिए।
उसो त ढकालले निर्माण गर्ने भनिएको जग्गा पनि सरकारी भएको भन्दै विवाद हुने गरेको छ। यद्यपि सो कुरालाई वनका कर्मचारीले पुष्टि भने गरेका छैनन्।
सो इलाका इलाका वन कार्यालय पहलमानको क्षेत्राधिकार अन्तरगत पर्दछ। अहिले केबुलकार निर्माणका लागि रुख कटानको काम सकिएको छ भने योजनास्थलमा एक हजार ८६६ रुख काटिएको वन कार्यालयले जनाएको छ।
सो केबलकारमा जिल्ला समन्वय समिति कैलालीका पूर्व सभापति सूर्यबहादुर थापाको पनि केही लगानी रहेको बुझिएको छ भने ढकालले उनैमार्फत घुसदेखि सेटिङ मिलाउने गरेको बताइन्छ।
आगामी २ वर्षभित्र चिसापानीदेखि राजकाँडासम्म केबुलकार सञ्चालनमा ल्याउने उनीहरूको दाबी छ। सो परियोजना सम्पन्न गर्न ७ अर्ब लगानी अनुमान गरिएको छ। सो परियोजनाको निर्माणस्थल लम्कीचुहा नगरपालिका–३ चिसापानी र मोहन्याल गाउँपालिका–७ राजकाडाँसम्म पर्दछ।
